هۆنراوه‌ی کوردی

 
قه‌ڵای نیشتمان

وه‌ته‌ن! گیان و سه‌ر و ماڵم فیدای تۆ

وه‌گیانی من که‌وێ ده‌رد و به‌ڵای تۆ

له‌ پێناوت ده‌نێم سه‌ر تا بزانی

منم ڕۆڵێکی ئازا و باوه‌فای تۆ

له‌بۆ پاراستن و حیفزی سنوورت

له‌باتی (ماژینۆ) سینگم قه‌ڵای تۆ

ده‌بێ من چۆن بژیم مه‌سروور و دڵشاد

که‌ ده‌ت بینم له‌ ده‌س بێگانه‌ دای تۆ

 

ده‌بێ که‌ی سه‌ربه‌خۆبی تۆ ؟ هه‌تا من

به‌ سه‌ربه‌ستی بکه‌م سه‌یر و سه‌فای تۆ

به‌ شینکه‌ و گوڵ سه‌راسه‌ر سوور و شینه‌

چ جوانه‌ دیمه‌نی کێو و چیای تۆ

له‌ گه‌ڵ تۆ بۆ نه‌جاتی نیشتمانت

ده‌ده‌ن(هێمن)! هه‌وڵ خوشک و برای تۆ

 

 

هیمن




Leave a Reply.

    هۆنیار

    هۆنیاری گه‌وره‌ی کورد
    مامۆستا هێمنی موکریانی

    Categories

    All

    RSS Feed