هۆنراوه‌ی کوردی

 
تۆم هه‌ر له‌ بیره‌

 

له‌ شایی دا له‌ وه‌ختی هه‌ڵپه‌ڕین دا

له‌ خۆشی دا له‌ کاتی پێکه‌نین دا

له‌ کۆڕی ماته‌م و گریان و شین دا

ئه‌من ئه‌ی نیشتمان تۆم هه‌ر له‌ بیره‌

 

به‌ شه‌و تاکوو به‌ سه‌رما زاڵ ده‌بێ خه‌و

به‌ ڕۆژ تاکوو دووباره‌ دێته‌وه‌ شه‌و

له‌ کاتێک دا که‌ ده‌دوێنم ئه‌م و ئه‌و

ئه‌من ئه‌ی نیشتمان تۆم هه‌ر له‌ بیره‌

 

زه‌مانێکی که‌ ده‌چمه‌ سه‌یری گوڵزار

له‌ گه‌ڵ پۆلی ڕه‌فیقانی وه‌فادار

ته‌نانه‌ت وه‌ختی ده‌سبازی له‌گه‌ڵ یار

ئه‌من ئه‌ی نیشتمان تۆم هه‌ر له‌ بیره‌

 

له‌ کوێستانێ ده‌می ڕاو و شکارێ

له‌ مه‌زرایه‌ که‌ خۆم هه‌ڵکرد له‌ کارێ

له‌ جێ ژوانێ که‌ ده‌گوشم مه‌مکی یارێ

ئه‌من ئه‌ی نیشتمان تۆم هه‌ر له‌ بیره‌

 

ده‌که‌م ته‌رخان له‌ ڕێی تۆ دا ژیانم

له‌ سه‌نگه‌ر دا به‌ره‌و ڕووی دوژمنانم

به‌ خاکی تۆ ده‌می ئاویلکه‌دانم

ئه‌من ئه‌ی نیشتمان تۆم هه‌ر له‌ بیره‌

شیلاناوێ ـ 1944

 

 

 

هیمن

 


Comments




Leave a Reply

    هۆنیار

    هۆنیاری گه‌وره‌ی کورد
    مامۆستا هێمنی موکریانی

    Categories

    All

    RSS Feed