هۆنراوه‌ی کوردی

 
ڕه‌شه‌مه‌

 

ده‌ک به‌خێر بێی قه‌ده‌مت خێره‌، چ خۆشی ڕه‌شه‌مه‌

تاکو تۆ هاتی نه‌ما و تێپه‌ڕی ڕۆژی ڕه‌شی مه‌

ئێسته‌که‌ کورده‌ هه‌موو بێ هه‌م و بێ ده‌رد و خه‌مه‌

شاده‌، ئازاده‌، ده‌کا گاڵته‌ و گه‌پ، که‌یف و گه‌مه‌

نیشتمانی هه‌موو ڕازایه‌وه‌، باخی ئیره‌مه‌

.....

شین و ڕۆڕۆ بوو به‌شی کورد و سه‌ری نابوو له‌ هه‌ش

چون له‌ ئازادی بڕێک نه‌یبوو ئه‌ویش به‌هره‌ و به‌ش

کورده‌واری هه‌موو داگرتبوو هه‌ور و ته‌می ڕه‌ش

نه‌ده‌بینرا له‌ چ لا تیشکی گه‌لاوێژی گه‌ش

به‌ شنه‌بایێکی ڕه‌حمه‌ت ڕه‌وی ئه‌و هه‌ور و ته‌مه‌

.....

هاته‌ مه‌یدانێ کوڕی کوردی وه‌کوو فیلی ده‌مان

هه‌وڵی ئازادی ده‌دا ئه‌و به‌ هه‌موو وه‌خت و ده‌مان

دوژمنی کوردی ئه‌وه‌ی دیت و تروسکایی نه‌مان

ده‌شه‌کێنێته‌وه‌ با ئێسته‌که‌ ئاڵایه‌که‌مان

سه‌ر و ماڵ و که‌س وکارم به‌ فیدای ئه‌و عه‌له‌مه‌

.....

لاوی کوردی له‌ هه‌موو لاوه‌ وه‌کو شێری ژیان

دێته‌ مه‌یدان و ده‌ڵێ: من ده‌مه‌وێ مافی ژیان

تازه‌ هه‌ڵناخه‌ڵه‌تێ ئه‌و، به‌ قسه‌ی نه‌رم و نیان

دوژمنی میلله‌تی کو‌ردی هه‌موو تووڕه‌ن که‌ دییان

ئه‌و به‌ سه‌ربه‌ستی ده‌ژی، دوژمنی زۆر و سته‌مه‌

 

هێـمن

 


Comments




Leave a Reply

    هۆنیار

    هۆنیاری گه‌وره‌ی کورد
    مامۆستا هێمنی موکریانی

    Categories

    All

    RSS Feed