هۆنراوه‌ی کوردی

 
سازی ناساز

 

بولبولی باڵ شکاوی وه‌ختی گوڵم

هه‌ر شه‌پۆڵان ده‌دا دڵی له‌ کوڵم

 

کوردی به‌ندیی به‌یانی نه‌ورۆزم

گڕی گرتووه‌ ده‌روونی پڕ سۆزم

 

موغی بێ ئاگری شه‌وی یه‌ڵدام

چاوڕێی چاره‌نووسی ناپه‌یدام

 

که‌وی بێ ده‌نگی نه‌و به‌هارانم

گوڵی بێڕه‌نگی چاو له‌ بارانم

 

کونجی جێ ژوانی چۆل و خامۆشم

سێبه‌ری نازه‌نینی ڕه‌شپۆشم

 

ده‌ستی به‌ربووی گچی گه‌ڕی شاییم

هه‌ستی خنکاوی لاوی سه‌وداییم

 

کێلی گۆڕی شه‌هیدی گومناوم

تاکه‌ داری کڕووزی بێ ئاوم تاکه‌ داری (ته‌ریکی) بێ ئاوم

 

ده‌فته‌ری شیعری شاعیری ڕووتم

شه‌می سه‌ر گۆڕ و داری تابووتم

 

کونی گیراوی کۆنه‌ شمشاڵم

خه‌ونی ئاڵۆز و خاتیره‌ی تاڵم

 

 

ژیله‌مۆی ئاگری به‌یانانم

باوکی فرمێسک و کوڕی ژانم

 

باڵه‌ سووتاوه‌کانی په‌روانه‌م

شووشه‌ باده‌ی به‌تاڵی مه‌یخانه‌م

 

چڵه‌ ڕێحانی دووره‌ دێراوم

سازی ناسازی هه‌ڵپه‌سێراوم

 

تکه‌ ئاونگی سه‌ر گه‌ڵای زه‌ردم

خه‌سته‌ و ده‌رده‌داری چی ده‌ردم

 

ئاخرین تیشکی خۆری پاییزم

شاعیری پیری تووڕه‌ و زیزم

 

چۆن ده‌توانم به‌ تۆ بڵێم من چیم ؟!

خۆم گومانم هه‌یه‌ که‌ هه‌م یا نیم ؟!

1975

هیمن

 


Comments




Leave a Reply

    هۆنیار

    هۆنیاری گه‌وره‌ی کورد
    مامۆستا هێمنی موکریانی

    Categories

    All

    RSS Feed