په‌ری شیعر
ئه‌ی کچی جوان! کچی له‌بار!
ئه‌ی کچی زانا و خوێنده‌وار!
ئه‌ی گولاڵه‌ی نواڵی کوێستان!
مایه‌ی شانازی کوردستان!
تیشکی هیوای دوا ڕۆژی ڕوون!
ساڕێژکه‌ری زامی ده‌روون!
گه‌لاوێژی به‌شۆقی گه‌ش!
ڕووناک که‌ره‌وه‌ی شه‌وی ڕه‌ش!
به‌هاری خێر و بێرو هات!
گزنگی به‌یانی ئاوات!
شیعرت ده‌وێ له منی پیر
له منی پیری گۆشه‌گیر
له شاعیری زمان بڕاو
له شاعیری ده‌فته‌ر دڕاو
له شاعیری به‌ساڵاچوو
له شاعیری وشک هه‌ڵاتوو
شێعرێکی ته‌ڕ، شیعرێکی خۆش
شێعرێک دڵان بێنێته جۆش
شێعرێک دامرکێنێ ده‌روون
به برینان بێنێ گۆشته‌زوون
شێعرێک وه‌ک خوناوه‌ی باران
شێعرێک وه‌ک سرته‌ی دڵداران
ناسکتر له هه‌ودای خه‌یاڵ
شیرینتر له بزه‌ی منداڵ
وه‌ک ئاره‌قه‌ی هه‌نیه‌ی جوانان
وه‌ک دڵه‌خورپه‌ی جێ ژوانان
وه‌کو که‌شم و نه‌شمی بووکێ
وه‌ک ڕه‌نگ و بۆنی گوڵووکێ
بێ خه‌وش وه‌ک ئاونگی گوڵ
پڕ پڕ له هه‌ست و سۆز و کوڵ
له ئاوی کانی ڕه‌وانتر
له په‌لکه‌زێڕینه جوانتر
شێعرێک وه‌ک سێبه‌ری بژانگ
وه‌کو خه‌رمانه‌ی ده‌وری مانگ
ڕێکتر له گه‌ڕی ڕه‌شبه‌ڵه‌ک
خۆشتر له خرمژنی کرمه‌ک
له گوشینی ده‌ستی دۆ خۆشتر
له مه‌که و ئه‌یه‌ڕۆ خۆشتر
وه‌ک نیگای چاوی خه‌واڵوو
به له‌شاندا بێنێ ته‌زوو
وه‌ک شه‌راب بگه‌ڕێ له خوێن
خه‌مڕه‌وێن بێ و نه‌شه بزوێن
شێعرێک وه‌ک ده‌ریای بێ بن
گه‌رمتر له باوه‌شی ژن
شێعرێک سرودی شادی بێ
شێعرێک ده‌نگی ئازادی بێ
شێعرێک مزگێنی نه‌جات بێ
شه‌وچه‌له‌ی کۆڕی خه‌بات بێ
شێعرێک ڕه‌ق بێ، ڕق بێ، قین بێ
گڕ بێ ، بڵێسه بێ، تین بێ
شێعرێک سه‌نگچنی سه‌نگه‌ر بێ
شێعرێک بریقه‌ی خه‌نجه‌ر بێ
هێزێک بێ دوژمنبه‌زێن بێ
مستێک بێ گورچوو ته‌زێن بێ
بڵێسه‌ی گولله‌ی هه‌ڵمه‌ت بێ
شه‌پۆلی ڕقی میلله‌ت بێ
شێعرێک نووستوو ڕاپه‌ڕێنێ
شێعرێک دوژمن داپه‌ڕێنێ
بشکێنێ ده‌رکی باستیلان
ئازاد بکا کۆیله و دیلان
هه‌ڵبڕێ قه‌فی زنجیران
چه‌ک بداته ده‌ست یه‌خسیران
بپه‌ڕێنێ ده‌ستی جه‌للاد
بهاڕێ ساتۆڕی بێداد
نرکه‌ی سینگی کرێکار بێ
ئاڵای شۆڕشی جوتیار بێ
هه‌روه‌ک گڕی ئاگری نه‌ورۆز
ڕه‌مزی ئازادی بێ و پیرۆز
هه‌زاران کاوه‌ی زه‌حمه‌تکێش
پاڵ پێوه بنێ به‌ره‌و پێش
شێعرێک هه‌م توند بێ و هه‌م ورد بێ
یانی شێعری ئه‌وڕۆی کورد بێ
به‌ڵام ئه‌ی فریشته‌ی جوانی
ڕه‌نگ بێ ئه‌م نوکته نه‌زانی
په‌ری شێعر وه‌ک کچی جوان
بۆ پیاوی پیر نایه‌ته ژوان
هیمن
ئه‌ی کچی جوان! کچی له‌بار!
ئه‌ی کچی زانا و خوێنده‌وار!
ئه‌ی گولاڵه‌ی نواڵی کوێستان!
مایه‌ی شانازی کوردستان!
تیشکی هیوای دوا ڕۆژی ڕوون!
ساڕێژکه‌ری زامی ده‌روون!
گه‌لاوێژی به‌شۆقی گه‌ش!
ڕووناک که‌ره‌وه‌ی شه‌وی ڕه‌ش!
به‌هاری خێر و بێرو هات!
گزنگی به‌یانی ئاوات!
شیعرت ده‌وێ له منی پیر
له منی پیری گۆشه‌گیر
له شاعیری زمان بڕاو
له شاعیری ده‌فته‌ر دڕاو
له شاعیری به‌ساڵاچوو
له شاعیری وشک هه‌ڵاتوو
شێعرێکی ته‌ڕ، شیعرێکی خۆش
شێعرێک دڵان بێنێته جۆش
شێعرێک دامرکێنێ ده‌روون
به برینان بێنێ گۆشته‌زوون
شێعرێک وه‌ک خوناوه‌ی باران
شێعرێک وه‌ک سرته‌ی دڵداران
ناسکتر له هه‌ودای خه‌یاڵ
شیرینتر له بزه‌ی منداڵ
وه‌ک ئاره‌قه‌ی هه‌نیه‌ی جوانان
وه‌ک دڵه‌خورپه‌ی جێ ژوانان
وه‌کو که‌شم و نه‌شمی بووکێ
وه‌ک ڕه‌نگ و بۆنی گوڵووکێ
بێ خه‌وش وه‌ک ئاونگی گوڵ
پڕ پڕ له هه‌ست و سۆز و کوڵ
له ئاوی کانی ڕه‌وانتر
له په‌لکه‌زێڕینه جوانتر
شێعرێک وه‌ک سێبه‌ری بژانگ
وه‌کو خه‌رمانه‌ی ده‌وری مانگ
ڕێکتر له گه‌ڕی ڕه‌شبه‌ڵه‌ک
خۆشتر له خرمژنی کرمه‌ک
له گوشینی ده‌ستی دۆ خۆشتر
له مه‌که و ئه‌یه‌ڕۆ خۆشتر
وه‌ک نیگای چاوی خه‌واڵوو
به له‌شاندا بێنێ ته‌زوو
وه‌ک شه‌راب بگه‌ڕێ له خوێن
خه‌مڕه‌وێن بێ و نه‌شه بزوێن
شێعرێک وه‌ک ده‌ریای بێ بن
گه‌رمتر له باوه‌شی ژن
شێعرێک سرودی شادی بێ
شێعرێک ده‌نگی ئازادی بێ
شێعرێک مزگێنی نه‌جات بێ
شه‌وچه‌له‌ی کۆڕی خه‌بات بێ
شێعرێک ڕه‌ق بێ، ڕق بێ، قین بێ
گڕ بێ ، بڵێسه بێ، تین بێ
شێعرێک سه‌نگچنی سه‌نگه‌ر بێ
شێعرێک بریقه‌ی خه‌نجه‌ر بێ
هێزێک بێ دوژمنبه‌زێن بێ
مستێک بێ گورچوو ته‌زێن بێ
بڵێسه‌ی گولله‌ی هه‌ڵمه‌ت بێ
شه‌پۆلی ڕقی میلله‌ت بێ
شێعرێک نووستوو ڕاپه‌ڕێنێ
شێعرێک دوژمن داپه‌ڕێنێ
بشکێنێ ده‌رکی باستیلان
ئازاد بکا کۆیله و دیلان
هه‌ڵبڕێ قه‌فی زنجیران
چه‌ک بداته ده‌ست یه‌خسیران
بپه‌ڕێنێ ده‌ستی جه‌للاد
بهاڕێ ساتۆڕی بێداد
نرکه‌ی سینگی کرێکار بێ
ئاڵای شۆڕشی جوتیار بێ
هه‌روه‌ک گڕی ئاگری نه‌ورۆز
ڕه‌مزی ئازادی بێ و پیرۆز
هه‌زاران کاوه‌ی زه‌حمه‌تکێش
پاڵ پێوه بنێ به‌ره‌و پێش
شێعرێک هه‌م توند بێ و هه‌م ورد بێ
یانی شێعری ئه‌وڕۆی کورد بێ
به‌ڵام ئه‌ی فریشته‌ی جوانی
ڕه‌نگ بێ ئه‌م نوکته نه‌زانی
په‌ری شێعر وه‌ک کچی جوان
بۆ پیاوی پیر نایه‌ته ژوان
هیمن
RSS Feed